Qué é o Portal Abertos da Consellería de Sanidade de Galicia?
Benvidos ao Portal Abertos da Consellería de Sanidade de Galicia, a plataforma de datos abertos corporativa da Consellería, destinada á publicación de conxuntos de datos para a súa consulta ou utilización por parte da cidadanía. Este portal ten como obxectivo fomentar a transparencia, a participación cidadá e o acceso á información, permitindo aos cidadáns, investigadores, e outras partes interesadas acceder, utilizar e aproveitar os datos xerados pola Consellería.
Qué son os Datos Abertos?
Os datos abertos refírense a información dixital que se atopa dispoñible de maneira libre e accesible a calquera persoa, sen restricións de uso ou distribución. Estes datos son valiosos recursos que poden ser utilizados para diversos fins, incluíndo a investigación, a toma de decisións informadas, o desenvolvemento de aplicacións e servizos, e a mellora da eficiencia gobernamental.
Os principios fundamentais dos datos abertos inclúen:
- Acceso Universal: Os datos deben estar dispoñibles para todos, sen discriminación nin restricións.
- Uso Gratuíto: Os datos deben ser de acceso gratuíto, sen custos adicionais ou barreiras financeiras.
- Reutilización: Os datos deben poder ser utilizados para calquera fin, incluíndo a creación de produtos ou servizos derivados.
Transparencia e Datos abertos no sector público
A apertura dos datos no sector público refírese á práctica de expoñer a información xerada ou custodiada desde os organismos públicos, permitindo o acceso á mesma e a súa reutilización: Os datos abertos constitúen unha ferramenta fundamental para promover a Transparencia nas Administracións Públicas:
- Transparencia pasiva: a cidadanía ten dereito a recibir a información que soliciten, sustentado en leis e procedementos de acceso á información.
- Transparencia activa: as institucións públicas comprométense a publicar a información de forma periódica. Esta información deberá ser visible, accesible e utilizable.
- Transparencia colaborativa: que implica un compromiso por parte dos axentes públicos de publicalos datos crus nun formato procesable para producir nova información.
Portal Abertos constitúese como unha ferramenta fundamental para a publicación da información xerada pola Consellería de Sanidade.